У Міністэрстве абароны Расіі заявілі, што на Купянскім і Запарожскім напрамках спынілі дзеянні ўкраінскіх ДРГ. Ва ўкраінскім Генштабе паведамілі, што знішчылі расійскі ўдарны верталёт Мі-24. У амерыканскім Інстытуце па вывучэнні вайны адзначаюць, што за спрэчкамі пра тое, хто больш варты ўзнагародаў за ўзяцце Бахмута, расіяне не звяртаюць належнай увагі на тое, у якой уразлівай сітуацыі аказаліся іх войскі ў гэтым раёне.
Галоўнае са зводак штабоў і высноваў экспертаў на 454-ы дзень вайны ва Украіне.
Генштаб УСУ: Баі за горад Бахмут працягваюцца
За мінулыя суткі расійскія войскі нанеслі 20 ракетных удараў па гарадах Днепрапятроўскай, Запарожскай і Харкаўскай абласцей, выкарыстаўшы крылатыя ракеты паветранага базавання, балістычныя ракеты «Іскандэр-М» і зенітныя кіравальныя ракеты з С-300, паведамляе Генштаб УСУ. Акрамя таго, нанеслі 48 авіяцыйных удараў, правялі каля 90 абстрэлаў з рэактыўных сістэм залпавага агню па пазіцыях УСУ і населеных пунктах. Ёсць параненыя сярод мірнага насельніцтва, пашкоджаныя шматкватэрныя і прыватныя жылыя дамы, дзіцячы сад і іншая цывільная інфраструктура.
— Расійскія войскі працягваюць засяроджваць асноўныя намаганні на Купянскім, Ліманскім, Бахмуцкім, Аўдзееўскім і Мар'інскім напрамках — тут адбылося больш за 30 баявых сутыкненняў. У эпіцэнтры баявых дзеянняў застаюцца Бахмут і Мар'інка.
— На Северскім і Слабажанскім напрамках расіяне за мінулыя суткі нанеслі авіяцыйныя ўдары па раёнах двух населеных пунктаў на Чарнігаўшчыне. Абстралялі 28 населеных пунктаў Чарнігаўскай, Сумскай вобласці і Харкаўскай абласцей.
— На Купянскім напрамку праціўнік вёў беспаспяховыя наступальныя дзеянні ў раёне Масютоўкі Харкаўскай вобласці. Нанёс авіяўдары паблізу трох населеных пунктаў, з артылерыі і мінамётаў абстраляў 10 населеных пунктаў Харкаўскай і Луганскай абласцей.
— На Ліманскім напрамку расіяне вялі беспаспяховыя наступальныя дзеянні ў раёне Белагораўкі Луганскай вобласці. Нанеслі авіяўдары па двух населеных пунктах, абстралялі — пяць.
— На Бахмуцкім напрамку баі за горад Бахмут працягваюцца. Праціўнік нанёс авіяўдары ў раёнах Бахмута, Іванаўскага і Белай Гары. Ад абстрэлаў пацярпелі 12 населеных пунктаў Данецкай вобласці.
— На Аўдзееўскім напрамку расійскія войскі спрабавалі наступаць у кірунках Новакалінавага, Севернага, Вадзянога і Першамайскага, але беспаспяхова. Цягам сутак нанеслі авіяўдары каля двух населеных пунктаў. З артылерыі абстралялі раёны шасці населеных пунктаў Данецкай вобласці.
— На Мар'інскім напрамку адбітыя шматлікія атакі праціўніка ў раёне горада Мар'інка. Таксама варожым абстрэлам падверглася вёска Перамога, размешчаная непадалёк.
— На Шахцёрскім напрамку расійскія войскі наступальных дзеянняў не вялі. Нанеслі авіяцыйныя ўдары ў раёнах Вуглядара, Прачыстоўкі і Залатой Нівы. Абстралялі тры населеныя пункты.
— На Запарожскім і Херсонскім напрамках расіяне абараняюцца. Нанеслі авіяцыйныя ўдары ў раёнах трох населеных пунктаў Запарожскай вобласці. Абстралялі 15 населеных пунктаў Данецкай, Запарожскай і Херсонскай абласцей, а таксама горад Херсон.
— Авіяцыя Сіл абароны нанесла восем удараў па раёнах канцэнтрацыі асабовага складу і ваеннай тэхнікі, а таксама два — па зенітна-ракетных комплексах расійскіх сіл.
— Знішчаныя чатыры крылатыя ракеты паветранага базавання Х-101/Х-555, расійскі ўдарны верталёт Мі-24, 23 ударныя дроны «Shahed» і дзевяць разведвальных БПЛА праціўніка.
— Падраздзяленні ракетных войскаў і артылерыі пабілі чатыры пункты кіравання, тры раёны канцэнтрацыі ўзбраення і ваеннай тэхнікі, чатыры склады боепрыпасаў, 11 артылерыйскіх сродкаў, радыёлакацыйную станцыю і тры станцыі радыёэлектроннай барацьбы расійскіх войскаў.
Мінабароны Расіі: Нанеслі ўдары па жывой сіле і ваеннай тэхніцы УСУ ў 112 раёнах
У Міністэрстве абароны Расіі заявілі, што ў раёне населенага пункта Тарэцк Данецкай вобласці пабілі пункт кіравання 24-й механізаванай брыгады УСУ.
— На Купянскім напрамку ўдарамі авіяцыі, агнём артылерыі і актыўнымі дзеяннямі падраздзяленняў Заходняй групоўкі войскаў нанесенае паражэнне падраздзяленням УСУ ў раёнах населеных пунктаў Масютоўка, Цімкаўка, Табаеўка Харкаўскай вобласці і Навасёлаўскае Луганскай вобласці. У раёне населенага пункта Цімкаўка спыненыя дзеянні дзвюх украінскіх дыверсійна-разведвальных груп. Страты УСУ за суткі склалі да 110 вайскоўцаў, дзве баявыя браніраваныя машыны і два аўтамабілі.
— На Чырвона-Ліманскім напрамку авіяцыяй, агнём артылерыі і цяжкіх агнямётных сістэм групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Чырвоная Дзіброва Луганскай вобласці і Серабранка Данецкай вобласці. Знішчаныя больш за 65 украінскіх вайскоўцаў, адзін танк, тры баявыя браніраваныя машыны, два аўтамабілі, а таксама гаўбіцы «Мста-Б», Д-20 і Д-30.
— На Данецкім напрамку падчас актыўных дзеянняў падраздзяленняў, удараў авіяцыі і агню артылерыі Паўднёвай групоўкі войскаў за суткі знішчаныя да 375 украінскіх вайскоўцаў, два танкі, пяць баявых браніраваных машын, чатыры аўтамабілі, гаўбіца Д-30, а таксама радыёлакацыйная станцыя контрбатарэйнай барацьбы AN/TPQ-50. У раёнах населеных пунктаў Верхнякаменскае і Ступачкі Данецкай вобласці знішчаныя два склады боепрыпасаў 60-й і 64-й механізаваных брыгад УСУ.
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Вялікая Навасёлка Данецкай вобласці, Марфопаль, Малая Такмачка, Новаданілаўка і Каменскае Запарожскай вобласці. У раёне населенага пункта Альгоўскае Запарожскай вобласці спыненыя дзеянні ўкраінскай дыверсійна-разведвальнай групы.
За суткі на гэтых напрамках знішчаныя больш за 150 вайскоўцаў, тры пікапы і адна гаўбіца «Мста-Б» УСУ.
— На Херсонскім напрамку ў выніку агнявога паражэння за мінулыя суткі знішчаныя звыш 20 украінскіх вайскоўцаў, тры аўтамабілі, а таксама гаўбіца «Мста-Б».
Усяго за суткі, паводле МА РФ, пабітыя 96 артылерыйскіх падраздзяленняў УСУ на агнявых пазіцыях, жывая сіла і ваенная тэхніка ў 112 раёнах. У раёне населенага пункта Аўдзееўка Данецкай вобласці знішчаныя два склады паліва для ваеннай тэхнікі УСУ. Сродкамі СПА перахопленыя 13 рэактыўных снарадаў сістэм залпавага агню HIMARS і «Ураган». Знішчаныя 11 украінскіх беспілотных лётных апаратаў.
Інстытут па вывучэнні вайны: Рэйд у Белгародскую вобласць выклікаў паніку ў расійскай інфармпрасторы
У свежай справаздачы амерыканскага Інстытута па вывучэнні вайны эксперты аналізуюць рэйд у Белгародскую вобласць падраздзяленняў Рускага добраахвотніцкага корпуса (РДК) і легіёна «Свабода Расіі» (ЛСР). Эксперты адзначаюць, што першая інфармацыя з’явілася раніцай 22 траўня: расійскія крыніцы паведамілі, што атрад РДК і ЛСР у складзе двух танкаў, БТР і яшчэ дзевяці адзінак бранятэхнікі перасек мяжу і заняў населены пункт Казінка ў Грайваранскім раёне Белгародскай вобласці, у межах 600 м ад мяжы з Сумскай вобласцю. Таксама паведамлялася, што група зайшла яшчэ ў два населеныя пункты — Глотава і Гара-Падол (3 км і 5 км ад мяжы адпаведна). Аднак, як адзначылі ў ISW, яны не знайшлі геалакацыйных пацверджанняў таго, што РДК або ЛСР дасягнулі Глотава або Гары-Падола. Пазней расійскія блогеры заявілі, што расійскія войскі нібыта вярнулі кантроль над населенымі пунктамі. Украінскія афіцыйныя асобы адзначылі, што ім вядома пра атаку, але адмаўлялі які-кольвек непасрэдны ўдзел УСУ.
Расейская інфармацыйная прастора адрэагавала на тое, што адбываецца, панікай, раз’яднанасцю і няўзгодненасцю, як і падчас іншых інфармацыйных атак, адзначаюць эксперты. Некаторыя блогеры зацыкліліся на тым, што РДК і ЛСР складаюцца ў асноўным з расіян, і закляймілі іх здраднікамі Расіі, якія працуюць на ГУР. Некалькі блогераў выказалі здагадку, што атака была мэтаскіраванай інфармацыйнай аперацыяй, закліканай адцягнуць увагу ад нядаўняга захопу Бахмута. Уладальнік ПВК Вагнера Яўген Прыгожын скарыстаўся інцыдэнтам і абвінаваціў расійскі ўрад у «бюракратычнай інэрцыі», якая спрыяла тэракту, а таксама раскрытыкаваў Мінабароны РФ за няздольнасць абараніць расійскія межы. Эксперты нагадваюць, што першая бачная лінія абарончых умацаванняў праходзіць за 2 км ад Гары-Падола, і здагадка пра тое, што сілам РДК удалося прарваць яе, падкрэслівае слабасць такіх умацаванняў, прынамсі, калі яны не цалкам укамплектаваныя добра падрыхтаванымі і экіпіяванымі салдатамі. У ISW таксама адзначаюць, што інфармацыйная прастора не аб’ядналася вакол адной недвухсэнсоўнай рэакцыі, што сведчыць перш за ўсё пра тое, што сітуацыя заспела расійскіх каментатараў знянацку.
Яшчэ адной тэмай справаздачы стала сітуацыя ў Бахмуце. Яўген Прыгожын заявіў, што сілы ПВК Вагнера будуць выведзеныя з усёй лініі фронту ва Украіне пасля 1 чэрвеня для адпачынку і аднаўлення прыкладна на два месяцы. ISW раней ацаніў, што сілы Вагнера наўрад ці будуць працягваць баявыя дзеянні за межамі Бахмута праз сур’ёзнае знясілення. Двухмесячны перыяд аднаўлення, абвешчаны Прыгожыным, можа прывесці да таго, што сілы Вагнера не будуць задзейнічаныя на ключавых напрамках украінскага контрнаступлення ў залежнасці ад таго, калі і як яно пачнецца, кажуць у Інстытуце.
Між тым у Расіі абмяркоўваюць, каму будуць прысуджаныя дзяржаўныя ўзнагароды за ўзяцце Бахмута, і спрачаюцца наконт ролі ПВК Вагнера і Прыгожына ў гэтай аперацыі, што адцягвае ад ваеннай сітуацыі, якая склалася для расійскіх войскаў. Эксперты кажуць, што войска РФ у раёне Бахмута аказалася ў вельмі ўразлівым становішчы, бо барацьба за горад дасягнула кульмінацыі. Гэта дае ўкраінскім сілам магчымасць працягнуць контратакі на ўжо аслабленых флангах у раёне Бахмута. Адыход вагнераўцаў таксама, імаверна, прывядзе да таго, што Мінабароны Расіі ўкамплектуе абарончыя рубяжы дрэнна навучанымі і забяспечанымі часткамі, падобнымі да тых, якія пад украінскімі контратакамі ў траўні адступілі са сваіх пазіцый, заўважаюць у ISW.
На што яшчэ звярнулі ўвагу эксперты:
- украінскія афіцыйныя асобы заявілі, што 22 траўня ў Бахмуце і яго ваколіцах працягваліся абмежаваныя баі;
- расійскія войскі працягвалі абмежаваныя наземныя атакі на Купянскім напрамку;
- расійскія сілы дамагліся нязначных поспехаў у раёне Аўдзееўкі і не праводзілі ніякіх пацверджаных або заяўленых наземных атак у заходняй частцы Данецкай вобласці;
- паведамляецца, што Запарожская АЭС была адключаная ад электразабяспечання сёмы раз з пачатку вайны;
- паведамляецца, што расійскія вайскоўцы скарачаюць працягласць навучання завербаваных у калоніях зняволеных, каб хутчэй кампенсаваць вялікія страты;
- расійскія акупацыйныя ўлады абвясцілі, што на занятых тэрыторыях пачалося папярэдняе галасаванне за кіроўную партыю «Адзіная Расія».