Жыхары некаторых раёнаў сталіцы скардзяцца на пагаршэнне якасці вады. Пра гэта паведаміў раніцай 27 верасня ў сваім тэлеграм-канале Мінгарвыканкам.
Паводле інфармацыі Мінскводаканала, пасля аднаўлення водазабяспечання аварыйнымі брыгадамі прадпрыемства неадкладна арганізавала прамыванне асобных участкаў сетак водазабяспечання.
«Вядзецца пастаянны маніторынг якасці з правядзеннем рэгламентных работ. Праблема будзе вырашаная», — запэўнілі ў Мінгарвыканкаме.
Нагадаем, увечары 26 верасня ў Кастрычніцкім, Заводскім і Ленінскім раёнах Мінска ў сістэме водазабяспечання назіралася зніжэнне ціску, адсутнасць і пагаршэнне якасці вады. Прычынай непаладак стала пашкоджанне магістральнага вадавода дыяметрам 1000 мм.
Водазабяспечанне, як паведамілі ў МЖКГ, было цалкам адноўленае. Вада пачала паступаць у 00.15.